Ungana na Ask.Lazaro na Mtume Onesmo Ndegi kutembelea Israel

Askofu Mkuu mstaafu wa Kanisa la Tanzania Assemblies of God, Emmanuel Lazaro, akiongoza kundi la viongozi mbalimbali wa makanisa na baadhi ya waumini wanaosafiri kwenda Israeli kutembelea maeneo matakatifu yaliyopo kwenye Bibilia, ambapo pamoja na mambo mengine wataliombea kanisa na nchi kwa ujumla.

Kampuni ya Nanuri Safari LTD inayoratibu safari hiyo ya kihistoria inakukaribisha kujiunga nao ili kukupa fursa ya kipekee ya kushuhudia kwa macho maeneo hayo matakatifu kama yalivyoainishwa katika Bibilia.

Askofu Mkuu mstaafu wa Kanisa la Tanzania Assemblies of God, Emmanuel Lazaro

Mtume Onesmo Ndegi

Utaratibu wa Safari ni kuwa msafara huu utaondoka jijini Dar es Salaam, tarehe 14/07/2013 na kurudi tarehe 22/07/2013. Katika safari hiyo, Askofu Lazaro pamoja na mkewe, watafuatana na, Mtume Onesmo Ndegi, Maaskofu, Wachungaji na Wakristo mbalimbali.

Gharama za safari yote ni ni Dola  za Marekani 2700, ikiwa ni pamoja na gharama za malazi, chakula cha mchana na usiku, usafiri wa kwenda maeneo mbalimbali nchini Israel, kibali cha kuingia maeneo ya nchi, VIZA na usafiri wa ndege.

Wanaotaka kujiunga na safari hiyo ya Baraka, ambayo imeratibiwa na NANURI SAFARI COMPANY LIMITED walipe fedha hizo kupitia:

NANURI SAFARI COMPANY LIMITED
NMB – ILALA BRANCH
ACCOUNT NO: 2036600111
DAR ES SALAAM.

Ukiwa na swali lolote, wasiliana nao kwa mawasiliano yafuatayo:
0715 – 640 777; 0782 – 640 777;  0716 – 316 109

AU
Fika katika Ofisi zao zilizopo Mwalimu House ghorofa ya 6, Ilala Boma jijini Dar es Salaam. Kumbuka nafasi ni chache wahi mapema kabla hujachelewa.

Waziri Mkuu atembelea Kanisa lilipolipuka Bomu na Kuzungumza na waumini na Viongozi wa Kanisa.

Waziri Mkuu, Mizengo Pinda  akizungumza na Viongozi na Waumini wa Kanisa Katoliki la Olasiti Jijini Arusha  May 7,2013 alikokwenda kutoa pole kufuatia mlipuko wa bomu la kutupwa kwa mkono uliotokea kanisani hapo May 6,2013 na kusababisha vifo na majeruhi. (Picha na Ofisi ya Waziri Mkuu

 

Masikitiko ya mjane wa Mch. Kachila aliyeuwa kinyama katika mgogoro wa kuchinja

Katika mahojiano na Mwandishi wa Shirika la CBN News, mjane wa Mchungaji wa Kanisa la Kipentekoste aliyeuwa kinyama katika mgogoro wa kuchinja, Rev. Mathayo Kachila, Bi. Generosa Kachila, alitamka maneno yanayoashiria uchungu wa moyo wake kutokana na mkasa wenyewe na hata jinsi hatua za kisheria zilivyochukuliwa.

Kwa uchungu mama huyu alisema: "I shouted, my Jesus, my Jesus, why have you forsaken me?"  tafsiri isiyo rasmi “Nilipaza Yesu wangu Yesu wangu mbona umeniacha?” kilio hiki cha mshtuko wa kuuawa kwa mumewe aliyekuwa kiongozi wa familia, kumemuacha mjane huyu akiwa  mlezi pekee wa watoto 12.

Jambo baya zaidi ni kuwa mahojiano ya mama huyu yanaashiria uchungu zaidi kwa vile waliotekeleza  unyama huo hawajakamatwa na mwenyewe anaamini kuwa wako Mjini Mbeya na wengine  wamevuka mpaka na kuingia nchini  Burundi.

Ni wazi kuwa mjane huyo anaona jinsi juhudi zilivyofanyika kwa kuwatumia  wapelelezi wa kigeni kuwapata wauaji wa kasisi kule Zanzibar, kwa kuchorwa mchoro uliowezesha mtuhumiwa kukamatwa, na angependa kuwaona wahusika wa mkasa ule kuanzia wachochezi mpaka watekelezaji wakisimama mbele ya sheria.

Tunaamini kuwa  machozi ya mama huyu ni mashtaka mbele za Mungu ambaye Biblia inamuelezea kuwa ni baba wa yatima na Mume wa wajane.

Kwa kuwa yeye ndiye pia mhukumu Mkuu wa dunia  tuna hofu kuwa ikiwa tutazembea  kwa namna yoyote ile  kutenda haki iliyostahili, yaani kuwasaka wauaji wa mumewe kwa nguvu kubwa kama ile iliyotumika katika  matukio mengine yaliyoonekana ya muhimu.

Kwa mujibu wa utafiti wa Mwandishi wa CBN,  miongoni mwa watuhumiwa wakuu ni yule anayetajwa kwa jina moja la Abdallah ambaye inaelezwa kuwa yupo nchi jirani ya Burundi.

Tunaishauri serikali yetu kuimarisha msako wa watuhumiwa wote ili haki itendeke na wale waliopoteza mpendwa wao waione na kuitambua haki  hiyo.

Ni vyema pia serikali ikafahamu kuwa suala hili sasa lina sura ya kimataifa na ulimwengu unasubiri kusikia hatua madhubuti zinazochukuliwa katika kuilinda amani ya  nchi.Hatua hizo madhubuti zitafuata kile kilichoelezwa karibuni na mmoja wa wahubiri wa kimataifa kutoka  Ulaya kuwa mataifa ya magharibi yana kampeni maalumu ya kuionyesha dunia kuwa Tanzania si kisiwa cha amani tena.

Tunaamini kuwa haki ndiyo nguzo kuu ya amani yetu, tusipojali haki hata ya mnyonge  amani yetu itakuwa bandia au woga na wala si ile inayojengwa na nguzo ya upendo na undugu wa kweli.

Pia tunaishauri tena serikali kuliamua suala la uchinjaji ambalo ni chanzo cha  mauaji ya mchungaji huyo, liamuliwe kwa mujibu wa sheria na katiba ya nchi ambao ndio mkataba baina ya watawala na watawaliwa.
Wakati huu wa kusubiri serikali kuamua, pia wachungaji na viongozi wengine wa dini wajiapushe na lugha kali zinazoweza kuchochea chuki zaidi.

Wadumu katika kuomba, kushauri kwa upendo na kuelekeza kwa kuwa dunia inawatarajia kuwa waamuzi wakati mambo yanapoharibika.

Ni vyema watanzania nao wakajitambua  na kujitenga na watu wenye  nia mbaya wawe ni wa ndani au wa nje ya nchi wanaotaka kuona damu ya watu ikimwagika. Ni wazi kuwa kila mmoja wetu anajua kilichotokea katika mataifa jirani kuanzia, Rwanda, (mauaji ya kimbari 1994) Kenya ( mauaji ya baada ya uchaguzi wa mwaka 2007) na hata yale ya Burundi na Kongo.

Chingafirst aja na mbinu mpya uimbaji nyimbo za injili

Kutokana na kukua kwa kasi kwa muziki wa Injili nchini, na kufanya miziki ya dunia kushuka katika tasnia ya muziki, mwimbaji William Chingafirst amekuja na staili mpya ya kumtukuza Mungu kwa njia ya uimbaji.
Mwimbaji Chingafirst, akiongea na chanzo ca blog jijini Dar es Salaam, alisema amekuja kivingine katika kumtukuza Mungu, pasi na ushindani, japo nyimbo zake zimeonekana kuleta ushindani maeneo ya Kahama, Geita na Tabora.

Akiongelea kuhusu albamu yake yenye nyimbo 11, alisema ameimba na kucheza kwa mitindo tofauti tofauti ikiwemo;  kwaito yenye asili ya Afrika Kusini, Rumba na Sebene toka Jamhuri ya Kidemokrasia ya Congo, sambamba na Dansi asili yake Tanzania na nyimbo za kuabudu zenye mchanganyiko wa lugha ya kiingereza, kiswahili na kifaransa.

Alisema lengo lake ni kumwimbia Bwana kama ilivyo kule mbinguni ambapo malaika, wazee 24 na watakatifu wanavyomsifu Mungu kwa ukuu wake.

Aidha, aliongeza kuwa, yuko tayari kuimba kwenye kanisa lolote linalomhubiri Kristo aliye hai, linaloamini habari ya wokovu na tayari alishafanya katika baadhi ya makanisa jijini Dar es Salaam, akitamba na wimbo wa Sina Deni Aka Mie japo wimbo uliyobeba albamu yake ni Namshangilia Mwokozi.

Mwimbaji huyo anabainisha kuwa, uimbaji ni ibada tosha mbele za Mungu, huku akiongeza kuwa, Neno linahubiriwa kwa sababu watu wamemuacha Mungu, lakini kinachoendelea mbinguni katika ulimwengu wa roho ni sifa na kuabuudu.

Miongoni mwa nyimbo ndani ya albamu hiyo ni; Niko huru (mwanawane), This is the day you have made for me, Namshangilia Mwokozi, Ibelieve in You, Sina Deni Aka Mie, Tanzania Tunaweza kuuponya ulimwengu kwa jina la Yesu, Heri Wenye Moyo Safi, Twende kwa Bwana, Tutaimba Milele, Mtakatifu na Kila Jambo.
Alisema nyimbo hizo zimesanifiwa kiroho katika studio ya Hosana na maproduza tofauti tofauti.

Bomu larushwa kanisani Arusha, mmoja afariki wengine kujeruhiwa!

Mtu mmoja amefariki dunia na wengine 59 kujeruhiwa akiwamo Balozi wa Vatican na Mwakilishi wa Papa nchini Tanzania, Askofu Mkuu Francisco Montecillo Padilla jana asubuhi baada ya mtu asiyejulikana kurusha bomu wakati wa sherehe ya uzinduzi wa Jengo la Kanisa la Parokia ya Mtakatifu Joseph Mfanyakazi, Olasiti, Arusha.

Miongoni mwa majeruhi, imeelezwa kuwa wanne ni mahututi.Kamanda wa Polisi wa Mkoa wa Arusha, Liberatus Sabas amelielezea kuwa tukio hilo kuwa ni la kigaidi hasa kutokana na kumlenga Balozi wa Papa nchini na kwamba mtu mmoja anashikiliwa akihusishwa nalo.

Wataalamu wa mabomu wa Jeshi la Wananchi Tanzania (JWTZ) wanachunguza aina ya bomu lililotupwa lakini uchunguzi wa awali unaonyesha lilikuwa limetengenezwa kienyeji.

Watu walioshuhudia tukio hilo wanasimulia kuwa bomu hilo lilirushwa yapata saa nne asubuhi wakati mgeni rasmi akijiandaa kufungua jengo la kanisa baada ya ujenzi wake kukamilika.

Shambulio hilo lilitokea wakati balozi huyo akiwa amesimama na mwenyeji wake, Askofu Mkuu, Josephat Lebulu, mapadri na watawa kutoka mashirika mbalimbali ya Jimbo Kuu la Arusha kwa ajili ya kukata utepe wa uzinduzi.

Kamanda Sabas alisema mtu aliyerusha bomu hilo alitokea nyuma ya kanisa hilo la ghorofa na kurusha bomu hilo kwa mkono wa kulia... “Alifanya jitihada za kupenya ili awafikie viongozi lakini alishindwa kutokana na wingi wa waumini waliokuwapo kwenye eneo hilo.”

Padri Moses Mwaniki aliyemshikia Balozi Padilla maji ya baraka yaliyotumika kubariki kanisa hilo, alisema kilichosaidia bomu hilo kutomfikia mwakilishi huyo wa Papa ni kutua mgongoni mwa mmoja wa waumini na kuanguka chini kabla ya kulipuka na kujeruhi watu.

“Ingawa hatuwezi kusema kwa uhakika, tunaamini mlengwa mkuu alikuwa mgeni wetu, Balozi Askofu Mkuu Padilla. Tunatakiwa kuliombea sana Taifa liondokane na matukio mabaya kama haya,” alisema Padri Mwaniki.

Baada ya tukio hilo, Balozi Padilla, Askofu Lebulu na viongozi wa kanisa hilo waliondolewa na kuhifadhiwa katika moja ya vyumba vya kanisa hilo kabla ya kutolewa kwenye eneo hilo yapata saa 5.30 asubuhi chini ya ulinzi mkali wa polisi.

Msemaji wa Kanisa Katoliki, Jimbo Kuu la Arusha, Padri Festus Mangwangi alisema aliyerusha bomu hilo alishuhudiwa na mtoto mdogo aliyekuwapo kanisani hapo.

Mapaka sasa mtu mmoja ashikiliwa na  Jeshi la Polisi kwa wa uchunguuzi wa tukio hilo

Baada ya bomu kuulipuka na jereuhi watu,watu wakikimbia kutafuta msaada katika sherehe hiyo.

Mahali ambapo inasemekana bomu lililipuka

Kanisa ambalo mbele yake ndio ilikuwa inafanyika sherehe hiyo na bomu kulipuliwa

Makamu wa Rais Dk. Gharibu Bilal akimsikiliza Askofu mkuu wa Kanisa la KKKT Tanzania Askofu Dk Alex Malasusa akizungumza katika matukio hayo kusho wakati akizungumza na majeruhi na wafiwa waliopteza ndugu katika milipuko ya mabomu iliyotokea leo jijini Arusha

Waandishi wa habari Afrika Mashariki watakiwa kuepuka habari za uchochezi

Dk. Richard Sezibera

Waandishi wa Habari wa nchi za Afrika Mashariki wametakiwa kuzitangaza nchi zao kwa kuandika habari zenye kuleta tija kwa taifa husika na kuepuka habari za kuharibu amani.

Wito huo umetolewa jana na Katibu Mkuu wa Jumuiya ya Afrika Mashariki, Dk. Richard Sezibera, wakati alipokuwa akifungua mkutano wa Afrika wa siku mbili wa maadhimisho ya Siku ya Uhuru wa habari duniani, unaofanyika mjini hapa.

Alisema kuwa umuhimu wa vyombo vya habari duniani ni mkubwa na hasa nchi za Afrika Mashariki, kwa kuwa zaidi ya watu milioni 33 Afrika Mashariki wanategemea vyombo vya habari kupata habari za nchi zao.

“Kutokana na hili naomba sana nyie waandishi wa habari nchi hizi muunganishe nguvu kwa kuzitangaza nchi zenu mambo mazuri kama vivutio vya asili na vingine, ili pia muweze kuwabadilisha viongozi pale wanapokwenda pabaya,” alisema.

Dk. Sezibera, alisema habari zinapatikana kupitia simu na kompyuta yenye mitandao ya jamii, hivyo kikubwa kuhakikisha wanahabari mnadumisha amani kwa kuandika mazuri ya nchi zenu. Akitoa mfano alisema uchaguzi wa Kenya kila mtu aliyekuwa nje ya nchi hiyo aliweza kufuatilia uchaguzi huo mwanzo hadi mwisho, kupitia vyombo vya habari, hivyo ni jambo la kupongezwa.

Aidha aliwasihi wanahabari, kujenga utamaduni wa kuandika kwa wingi matukio yanayofanyika nchi za Afrika Mashariki, badala ya kutegemea kupata habari za nchi zao kupitia CNN.

“Mimi nasikitika sana kuona habari za nchi zetu hizi za Afrika Mashariki zinaelezewa kwa kiasi kikubwa na nchi zingine, jamani tubadilike,” alisisitiza.

Aliwapa pole waandishi wa habari wote waliopatwa na majanga, vifo mbalimbali wakati wa ufanyaji wa kazi zao.

Naye Katibu Mkuu wa Umoja wa Mataifa, Ban Ki-Moon na Mkurugenzi Mkuu wa UNESCO, Irina Bokova, ametoa ujumbe wake uliosomwa na Vibeke Jensen na Mkurugenzi wa UNESCO, kwenye maadhimisho hayo. Alisema uhuru wa kujieleza kama unavyoelezwa kwenye kifungu cha 19 cha tamko la ulimwengu la Haki za Binadamu ni muhimu kuwawezesha watu na kujenga jamii huru na za kidemokrasia.

Alisema Ikiwa ni haki ya msingi, haki hii ya kujieleza pia ndani yake ina maelekezo ya jinsi ya kulinda na kuendeleza haki nyingine zote za binadamu.

“Lakini utekelezaji wake hauji tu, unahitaji mazingira salama ya mjadala, ambapo kila mmoja anaweza kuongea kwa uhuru na uwazi, bila woga wala wasiwasi wa kulipiziwa kisasi,” alisema.

Alisema kwa sasa kuna changamoto nyingi tangu miaka 20 ipite ya maadhimisho hayo, sababu waandishi wengi wamekuwa walengwa wa mara kwa mara wa vitendo vya vurugu.

“Zaidi ya waandishi wa habari 600 duniani wameuawa katika miaka kumi iliyopita wengi wao wakiwa kazini kuripoti tena kwenye maeneo ambayo hayana vurugu,”alisema.

Jukwaa wa Wakristo Tanzania lamtaka JK kutoa msimamo wa kisheria kwa Uislamu,Ukristo

Jukwaa wa Wakristo Tanzania limemtaka Rais Jakaya Kikwete kutoa msimamo wake kisheria ambao utaleta upatanisho kati ya waumini wa dini ya Kiislamu na Kikristo.

Jukwaa hilo limesema kauli iliyotolewa na rais juzi wakati wa sherehe za Mei Mosi, Mbeya ya kutaka Watanzania waishi kama zamani ina utata kwa sababu imetafsiriwa tofauti na baadhi ya Watanzania.

Hivi karibuni Rais Kikwete wakati akizungumza kwenye sherehe za Mei Mosi alisema Serikali bado inaendelea kuzungumza na viongozi wa dini wa pande zote na kuwaunganisha ili kuona maelewano yanarejea kama ilivyokuwa zamani na kuwataka Watanzania waendelee kuishi bila kubaguana au kuchukiana kwa dini zao.

Akizungumza jana, Mwenyekiti wa jukwaa hilo, Askofu Tarcisius Ngalalekumtwa ambaye pia ni Rais wa Baraza la Maaskofu wa Kikatoli Tanzania (TEC), alisema licha ya maneno hayo kuwa mazuri lakini bado kuna utata kwa sababu baadhi ya raia wameingiwa na wasiwasi.

Alisema maeneo mengine wakristo hawali nyama kwa sababu hawataki kulazimishwa kula nyama zilizochinjwa kwa ibada za kiislamu na kwamba suala hilo siyo dogo kama wengine wanavyofikiri kwa sababu limegharimu maisha ya watu.

Alisema licha ya kuwapo kwa kauli za uchochezi wa kuwaua viongozi wa dini ya kikristo,kuchoma makanisa na mauaji ya viongozi wa kikristo bado hazijafutwa wala waliozitoa hawajakamatwa na kwamba hawajui kinachoendelea.

Mwenyekiti huyo alisema madai ya msingi ya waislamu yaliyosababisha waanzishe vurugu na mauaji hayajajibiwa na Serikali huku maswali yaliyoulizwa na wakristo kutokana na madai hayo na vurugu hizo nayo yakiwa hajayajibiwa.

Alisema licha ya kukutana na Rais Kikwete Aprili 23, mwaka huu ambaye alihimiza viongozi wa wakristo na waislamu wakutane ili kuondoa tofauti zao zisizo za kiimani lakini bado wanasubiri maelekezo toka serikalini kwani ajenda ya uvunjifu wa amani viongozi wa dini hawawezi kuizungumzia kwa sasa bila majibu ya Serikali kwa madai yaliyozua uvunjifu huo wa amani.

Allen Mwamwaja na Uzinduzi wa Album ndani ya Kijitonyama

Kiingilio ni Bure

AFLEWO TANZANIA 2013 YAFANA

Mkesha Mkubwa Tanzania wa Kusifu na Kuabudu AFLEWO (Africa Lets Worship) umefanyika vizuri katika kanisa la BCIC likiudhuliwa  na Maelfu ya watu kutoka maeneo mbalimbali ya Jiji la Dar es salaam na Mikoa ya Jirani kama Moshi,Mwanza na Mingine,

Mkesha wa AFLEWO ulifunguliwa kwa Maombi na Askofu Silvester Gamanywa wa Wapo Mission International akifungua kwa maombi na kuwa ameufungua rasmi ukianza Kwa sifa na Kuabudu.

Watumishi wa Mungu kutoka Makanisa Mbalimbali walikuwepo katika Mkesha huo kuhakikisha wanaumuika na Kufanya kitu kimoja kwa ajili ya mwili wa Kristo katika Taifa la Tanzania.

Bishop Silvester Gamanywa wa Wapo Mission International akifungua Mkesha wa AFLEWO kwa maombi.BCIC Mbezi Beach

Pastor Ferdie Kyara akihubiri Neno katika Mkesha wa AFLEWO TANZANIA

Fullshangwe....

Pastor Gal with Kagaruki

AFLEWO Patron Pastor Abel Orgenes

Tanzania Shall never Be the Same,,,,

Majembe ya Bwana Ma MC wa Event

Praise Team Kutoka Moshi

Dance

The Voice

AFLEWO Tanzania kuomba kwa ajili ya Viongozi wa Serikali na Dini

Katika kuelekea Mkesha Mkubwa wa AFLEWO Tanzania ikiwa imebaki siku moja kufanyika Baadhi ya viongozi wamezungumza mbele ya waandishi wa habari kuhusianana Mkesha huo pale DPC Kinondoni.

 Maandalizi yamekamilika kwa asilimia 90 mpaka sasa kuanzi Mass Choir hadi mambo mengine,hivyo kilicho baki ni kuanza Mkesha huo Kesho saa 3:00 kamili usiku BCIC Mbezi Beach (Kituo cha Jogooo) katika kanisa la Bishop Gamanywa wa Wapo Mission International 

Katika Mkesha huo kunategemewa kuwa na wageni kutoka Nchi za jirani na mikoa ya jirani kama Mwanza,Moshi,Arusha na mahala pengine nje ya Jiji la Dar es salaam.

Mkesha Mkubwa wa AFLEWO utakuwa na kusifu na Kuabudu na Maombi kwa Taifa na Viongozi wa Nchi pia kuomba kwa ajili ya Viongozi wa Dini zote ukizingatia kama Taifa tunapitia katika changamoto na tofauti za kidini,hivyo tuna hitaji kwenda mbele za Mungu kwa mambio katika Mkesha wa AFLEWO Tanzania,Alisema hayo Pastor Fredie Kyara alipokuwa akizungumza na waandishi wa habari.

Walio Pichani Kushoto ni Samuel Sasali, Mkurugenzi wa Habari Aflewo, Bishop Freddie Japhet Kyara Mlezi Wa Aflewo Tanzania, Pastor Paul Safari Mlezi wa Aflewo Tanzania, Samuel Rodin Mwangati Music Director wa Aflewo.

 Bishop Freddie Japhet Kyara Mlezi Wa Aflewo Tanzania akizungumza na waandishi wa kwa msisitizo na kuhusu Mkesha huo

Samuel Sasali, Mkurugenzi wa Habari Aflewo, Bishop Freddie Japhet Kyara Mlezi Wa Aflewo Tanzania, Pastor Paul Safari Mlezi wa Aflewo Tanzania, Samuel Rodin Mwangati Music Director wa Aflewo.