Watuhumiwa 36 kortini kwa kuchoma makanisa.

Watu 36 pamoja na mtoto anayedaiwa kukojolea kitabu kitakatifu cha Kur’an eneo la Mbagala, wamefikishwa katika Mahakama ya Hakimu Mkazi Kisutu, jijini Dar es Salaam, wakikabiliwa na kesi nne tofauti ikiwamo kuchoma makanisa.

Mashitaka mengine waliyosomewa ni kuharibu mali zenye thamani ya Sh. milioni700 na unyang’anyi wa kutumia silaha.

Katika kesi ya kwanza ya kuchoma makanisa, washtakiwa ni Mahenga Yusufu, Hamad Sokondo, Shego Mussa Abdallah Said, Ramadhani Salum, Mashaka Iman, Kasim Juma, Ibrahim Jumanne na Hamza Mohamed.

Wengine ni, Mikidad Sadik, Juma Mbegu, Rahib Abdallah, Issa Seleman, Hamis Kimwaga, Ramadhani Mbulu, Hemed Mohamed, Msham Alifa na Mohamed Yusufu.

Washtakiwa hao walisomewa mashtaka yao mbele ya Hakimu Mkazi, Sundi Fimbo.

Upande wa mashtaka uliongoza na Wakili wa Serikali Mwandamizi, Tumain Kweka, akisaidiana na Ladislaus Komanya.

Kweka alidai kuwa, Oktoba 10, mwaka huu eneo la Mbagala Zakhiem, wilaya ya Temeke, jijini Dar es Salaam, washtakiwa walikula njama ya kutenda kosa.

Katika shtaka la pili, ilidaiwa kuwa Oktoba 12, mwaka huu katika eneo la Mbagala Zakhiem, jijini Dar es Salaam, washtakiwa walivunja na kuingia ndani ya Kanisa la Kiinjili la Kilutheli Tanzania (KKKT) na kuharibu madhabahu yanayotumika kufanyia maombi na ibada kwa washarika wa kanisa hilo.

Wakili huyo alidai kuwa, siku ya tukio la pili, washtakiwa wote kwa makusudi waliharibu feni, milango, kiyoyozi, viti, mfumo wa umeme, makabati, makochi, madhabahu na uzio wa kanisa hilo vikiwa na thamani ya Sh. milioni 500.

Katika shtaka la nne, ilidaiwa kuwa katika tukio la pili na la tatu, washtakiwa walifanya kosa la unyang’anyi wa kutumia silaha baada ya kuiba kompyuta mpakato (Laptop), kinanda, maspika na printa, vyote vikiwa na thamani ya Sh. milioni 20 mali ya KKKT.

Ilidaiwa kuwa mara na kabla ya wizi huo, washtakiwa walimtishia kwa nondo na matofali mlinzi wa kanisa hilo, Michael Samuel, ili kujipatia mali hizo.

Katika shtala la tano, ilidaiwa kuwa siku ya tukio washtakiwa walichoma moto kanisa kwa makusudi mali ya KKKT Usharika wa Mbagala.

Katika kesi ya pili, kati ya Oktoba 10, mwaka huu washtakiwa wanadaiwa kula njama ya kutenda kosa la kuharibu mali.

Shataka la pili, ilidaiwa kuwa Oktoba 12, mwaka huu Mbagala Kizuiani, jijini Dar es Salaam, washtakiwa waliharibu vitu mbalimbali ikiwamo kuvunja milango, viti na madhabahu mali ya Kanisa la Anglikana Parokia ya Kizuiani.

Komanya alidai kuwa katika shtaka la tatu, siku ya tukio la pili, eneo la Mbagala Kizuiani, waliiba vitu mbalimbali mali ya kanisa hilo.

Upande wa Jamhuri ulidai kuwa katika kesi ya tatu, inawakabili washtakiwa Mwalimu Said, Omary Shaban, Ibrahim Msimbe, Abdallah Said, Pascal Kashiriri, Abdukadir Haji, Ahmad Juma na Mohamed Chobe kuwa Oktoba 12, mwaka huu huko Mbagala, jijini Dar es Salaam, washtakiwa walikula njama ya kutenda kosa la uhalifu.

Katika shtaka la pili, ilidaiwa kuwa Oktoba 12, mwaka huu eneo la Maduka Tisa, Kibonde Maji, washtakiwa waliharibu vitu mbalimbali mali ya Kanisa la Agape vikiwa na thamani ya Sh. milioni 80.

Komanya alidai katika shtaka la tatu, Oktoba 12, mwaka huu, washtakiwa walichoma moto madhabahu sehemu inayotumika kwa ajili ya kufanya maombi kwa waumini wa Kanisa la Agape, mali ya kanisa hilo.

Katika kesi ya nne, washtakiwa ni Issa Abdallah, Hamisi Masudi, Ramadhani Mohammed, Hemedi Mohammed, Mshamu Alifa, Mohammed Musa, Hashimu Omary, Abas Saidi, Iddi Selemani, Yahaya Ngede, Daniel Ngamulile, Hassan Mohammed, Saidi Mkoba, Dodo Mohammed, Mohammed Hamisi, Amiri Mohammed na Ally Selemani.

Wakili huyo wa serikali alidai kuwa washtakiwa waliharibu magari mbalimbali likiwamo la Jeshi la Polisi.

Thamani ya magari ya Kanisa la TAG, SDA Usharika wa Mbagala thamani yake ni Sh.  56,790,000.

Pia, washitakiwa wanadaiwa kuvunja makanisa hayo na kuiba vifaa mbalimbali vya magari waliyoharibu, vyote vikiwa na thamani ya Sh 14,820,000.

Washtakiwa walikana mashtaka na mahakama ilisema itatoa masharti ya dhamana Oktoba 30, mwaka huu.

Katika hatua nyingine, mtoto anayedaiwa kukojolea kitabu hicho kitakatifu alisomewa mashtaka katika Mahakama ya Watoto ya Kisutu.

Tofauti na siku nyingine panapokuwepo na kesi dhidi ya waumini wa Kiislamu, jana hali ilikuwa tofauti kwa sababu  viwanja vya mahakama  havikuwa na watu. Waliokuwepo ni ndugu wachache wa washtakiwa hao.