Waumini wa huduma ya Mtakatifu Prince Mission yenye Makao Makuu yake Sinza jijini Dar es Salaam, wameomba msamaha kwa Mungu kwa baadhi ya viongozi wa umma kutokana na kile kilichoelezwa kuwa ni kuusaliti umma wanaoungoza.
Hatua hiyo inatokana na matumizi ya misahafu wanapokula viapo vya kuutumikia umma, kisha kutotimiza azma hiyo badala yake kujinufaisha binafsi na ‘kuwaangamiza’ raia wanaowachagua.
Kiongozi huyo wa kiroho, Nabii Cres1, aliwaambia waumini hao wanaojulikana kwa jina la Wateule katika ibada iliyofanyika mapema wiki jana kuwa, watu wengi wamekuwa wakiapa bila kujua madhara yanatokana na viapo hivyo.
“ Viapo vingine vinasababisha mahangaiko makubwa, na hii inatokana kukosa uaminifu binafsi, wapo wanaohangaika kwa ajili ya hilo, tumuombe Mungu atuondolee adhabu hiyo,” alisema akiwalenga viongozi hao.
 |
| Kiongozi wa kiroho, Nabii Cres1 |
Alisema, baadhi ya viongozi wa serikali duniani, wanaapa katika maeneo mbalimbali kwa kutumia vitabu vitakatifu ambavyo ni neno la Mungu, kuwa watenda kwa mujibu wa haki sawa na maslahi kwa watu wote, lakini wanapomaliza inakuwa kinyume chake.
“Baadhi yao wanaapa kuwa watalinda mali za wananchi, watatenda haki, lakini badala yake wanatenda tofauti na wengine wakijitajirisha wao na familia zao, jambo ambalo ni dhambi mbele za Mungu,”alisema.
Nabii Cres1, alisema miongoni mwa matendo yaliyo kinyume na viapo hivyo, ni kwa baadhi ya viongozi kuishi maisha ya kuhangaika moyoni na kukosa amani, kuondokewa na mvuto wa kupendwa na wananchi, pamoja na kuwa ana mali nyingi.
“Wengi unakuta wanaapa huku wakijua hawataweza kutenda kama walivyoaapa. Inatakiwa kuwaombea msamaha kwa Mungu kwani viapo visivyo vya dhati huleta madhara kwa jamii mzima,” alisema.
Aliongeza, “inakuwa laana kwa taifa, kama tunapenda dunia ipone, lazima tuombee viongozi wote walioko madarakani, kuanzia ngazi ya juu hadi familia ili Mungu awawezeshe watende mema na kuzingatia viapo vyao kwa ustawi wa taifa letu na jamii kwa ujumla.”
CHANZO: NIPASHE
CHANZO: NIPASHE
No comments:
Post a Comment